Ingmar Bergman

Dr Ernst Ingmar Bergman^ⓘ/? [ˌiŋːmaɾ ˈbæɾːʝman] (* 14. Juli 1918 z Uppsala, Schweede; † 30. Juli 2007 uf Fårö, Schwsede) isch e schweedische Dräibuechautor, Film- und Theaterreschissöör gsi. 1997 isch dr Bergman bi de Filmfestspiil z Cannes as „Beste Filmreschissöör vo alle Zite“ geert worde. Die mäiste vo sine Film ghööre zur Gattig vom Filmdrama. Er het aber au Komödie und Dokumentazioone dräit. In sine Film het er hüfig existenzielli Theme wie dr Dood, d Suech noch Gott, d Äinsamkäit vom Mensch und zwüschemenschligi Beziejige thematisiert. Si Filmsprooch isch under anderem vo lange Noochiistellige und ere spezielle Belüüchtig charakterisiert, won er zämme mit sim Kameramaa Sven Nykvist entwicklet get.^[1][2] Do und dört het er Sexualidäät diräkt daargstellt und het wäge däm in de 1950er und 1960er Joor immer wider Brobleem mit dr Zensur überchoo.^[3][4] Das het under anderem dr Film Das Schweigen zum ene Skandalerfolg gmacht.^[5] Anderi wichdigi Wärk si Das siebente Siegel, Wilde Erdbeeren, Szenen einer Ehe und Fanny und Alexander.

1. ↑ Produktionsnotizen zu Licht im Winter Archivlink (Memento vom 21. Septämber 2013 im Internet Archive) uf dr Website vo dr Ingmar-Bergman-Stifdig, abgrüeft am 6. Septämber 2012.
2. ↑ Stephen Holden: Sven Nykvist, 83, a Master of Light in Films, Dies, The New York Times vom 21. Septämber 2006, abgrüeft am 3. Dezämber 2010.
3. ↑ Stig Björkman, Torsten Manns, Jonas Sima: Bergman über Bergman, Fischer, Frankfurt 1987, ISBN 3-596-24478-1, S. 88–91.
4. ↑ Artikel in Der Spiegel Nr. 44/1960 vom 26. Oktober 1960, S. 70–71.
5. ↑ Gert H. Theunissen: Das Schweigen und sein Publikum, DuMont Schauberg, Köln 1964.